Shkruan: Ilir HAVOLLI, Psikolog klinik….
Shkolla luan një rol të madh në qetësimin e fëmijëve me probleme. Në të njëjtën kohë, ajo është një nga faktorët më kuptimplotë për zhvillimin dhe për shoqërizimin e fëmijëve. Kjo është arsyeja që mbështetja e fëmijëve në përpjekjet e tyre për mësimet, ndihmon shumë për normalizimin e jetës së fëmijëve në kushte të vështira.
Marrëdhëniet e mira midis fëmijës dhe kujdestarit që e ndihmon atë për të studiuar, janë të rëndësishme si për fëmijën që ka probleme në shkollë edhe për ata që kanë probleme psikologjike. Vetë prindërit mund të kenë vështirësi dhe të mos e ndjejnë veten të zotë për t’u dhënë ndihmën e nevojshme fëmijëvë të tyre për të mësuar.
Mjedisi shkollor përfaqëson një formë sigurie dhe organizimi, prandaj kryerjes së shkollës duhet t’i kushtohet një vëmendje e veçantë, gjë që shpesh nuk bëhet në rrethana të tilla. Përveç kësaj, veprimtaria që synon mbështetjen e shkollës është vetëm një vëmëndje ndaj fëmijëve dhe krijon mundësi për njohjen e problemeve të veçanta.
Kur merremi me një fëmijë me probleme emocionale ose me përqëndrim jo të mirë, ka rëndësi t’i tregohet fëmijës se të gjitha detyrat e vështira mund të thjeshtëzohen, duke punuar në grupe më të vogla dhe duke ndarë punën në njësi më të vogla. Fëmijët me kërkesa dhe vështirësi të veçanta gjithashtu përfitojnë nga vëmendja dhe ndihma më individuale. Në çdo rast duhet të vihet në dukje suksesi i fëmijës, çdo arritje e tij, pasi kjo bën që të rritet besimi në vetvete dhe respekti për veten.
Mundësia e personelit për të ndihmuar fëmijën në studim është një ndihmë tjetër në proçesin e rimëkëmbjes. Një problem matematikor i zgjidhur me sukses, një fjali e lexuar mirë, apo një detyrë shtëpie mund ta bëjë fëmijën të ndjehet ilumtur dhe i suksesshëm dhe shërben si një nxitje për të vazhduar punën më me ngulm dhe për të ecur përpara.
- Veprimtaritë që ndihmojnë studimin u japin fëmijëve një mundësi më shumë për të shprehur mendimet dhe idetë e tyre, për të rikujtuar dhe zgjeruar dijet e tyre.
Shkruan: Ilir HAVOLLI, Psikolog klinik….
