Shkruan: Ilir HAVOLLI, Psikolog Klinik ( Pjesa I )
Marrëdhëniet martesore të dëshpëruara nuk ka të ngjarë që të zgjasin. Por, shqetësimi më madh ngrihet sepse numri i ndarjeve është rritur shumë në mbarë botën. Kështu p.sh., aktualisht në SHBA, konstatohet se një në dy martesa përfundon me divorc. Edhe vënde të tjera raportojnë për një shkallë të lartë të divorceve. Vëndi ynë, Shqipëria dhe Kosova ka një trend në rritje sa i përket numrit të divorcëve apo të vendimit për të shijuar jetën “singell”.
Përgjegjësia kryesore për rritjen e zhgënjimit martesor duket se bie tek ndryshimet e gjëra sociale. Një pjesë e studiuesve shpjegojnë se të njëjtat zhvillime sociale dhe teknologjike që lehtësojnë qëndrimin “singëll” duket se ndikojnë tek njerëzit që të zgjedhin divorcin në vend që të zvarrisin një martesë të dështuar. Dekadat e fundit është rritur numri i grave që nuk i varin më shpresat ekonomike tek të ardhurat e burrit të tyre. Përparimi teknologjik ndihmon shumë burrat dhe gratë e divorcuar që të mirëmbajnë shtëpinë dhe fëmijët që kanë në ngarkim. Ndërkohë, shoqëria është zhveshur nga stigma që shoqëronte dikur njerëzit e divorcuar.
Heqja e barrierave që pengonte dikur divorcin, ka shtruar kërkesën që martesat të kapin nivelin më të lartë të lumturisë, gjë që kurrë më parë nuk ka qënë parashikuar të arrihej, por që ndoshta e ngarkon martesën edhe me një detyrë tjetër shumë të rëndë për t`u mbajtur. Sot shumica e çifteve presin nga martesa që të sigurojë dashuri romantike, rritje personale dhe vetë-përmbushje për të dy partnerët. Nëse nuk ndodh kështu, rriten shanset për divorc.
Shkruan: Ilir HAVOLLI, Psikolog Klinik
(Burimi:: Golan, 1981)
