Fëmijët dhe teknologjia.
Shkruan: Tea HIDA, Studente e psikologjise
Menaxhimi i përdorimit të teknologjisë në familjet tona është sfida më e madhe që ne hasim çdo ditë. Por këtë herë dua të ndalem tek fëmijët, pasojat që sjell teknologjia (telefonat), në përqëndrimin e tyre, dhe udhëzime se si duhet përdorur dhe se sa kohë duhet kaluar në varësi të moshave.
Përqëndrimi.
Ne e dimë që të përdorësh telefonin kur jemi duke i dhënë makinës ka pasoja, por kur fëmijët janë duke bërë detyrat e shkollës ?
Është diçka që pothuajse të gjithë fëmijët e bëjnë, dhe prindërit kanë qenë të pranishëm aty duke i lejuar që ata të kontrollojnë telefonin e tyre, në mënyrë që thjesht të largojnë mendjen dhe më pas të rikthehen përsëri tek detyrat e tyre. Por duke iu referuar një studimi të kohëve të fundit rezultoi se, prezenca e telefonit apo tabletit gjatë të mësuarit, redukton mundësinë e një personi që të përqëndrohet. Në këtë studim, personat që i lanë telefonat në dhomën tjetër patën rezultate më të larta se ata që i kishin telefonat pranë vetes, në qetësi, dhe të kthyer përmbysë në tavolinë. Studentët pohuan se në mënyrë të pa ndërgjegjshme ata ishin duke menduar për telefonat e tyre gjatë kohës që nuk i kishin në duart e tyre, dhe kjo gjë çoi në rezultate më të ulta gjatë provimit.
Pra në bazë të këtij studimi, mendoj se secili prej nesh e di se çfarë duhet të bëjë tani!
Udhëzime rreth përdorimit të telefonave apo tabletëve sipas moshave:
Fëmijët 0-4 vjeç:
– Ekspozim ndaj teknologjisë në mënyrë shumë të limituar.
-Filloni dhe tregojini si të ndjekin shembullin tuaj më të mirë. Mos kontrolloni mesazhet apo çdo njoftim në telefon kur jeni duke kaluar kohë së bashku familjarisht. Mos harroni që fëmijët mësojnë dhe imitojnë veprimet e më të rriturve!
-Mos e nënvlerësoni rëndësinë dhe vlerën që kanë lojrat tradicionale dhe hapësirat e hapura në natyrë.
Fëmijët 5-11 vjeç:
– Shikoni gjërat së bashku. Nëse shqetësoheni se fëmijët tuaj po marrin mesazhe të këqija nga mediat, mënyra më e mirë për t’iu kundërvënë atyre është ti shikoni së bashku me fëmijët tuaj dhe ti tregoni se kur diçka nuk është e drejtë.
-Koha për të parë çdo gjë përpara ekranit, nuk duhet të jetë gjatë gjithë kohës!
-Bëhuni të zgjuar! Përshtateni kohën që duhet për të qëndruar përpara ekranit në bazë të imagjinatës që ka fëmija juaj, dhe moshës së tij.
-Inkurajoini për aktivitete të tjera. Bëhuni ju shembull që fëmija juaj të jetë i shëndetshëm dhe të ushtrojë një apo më shumë sporte që i pëlqejnë.
Fëmijët +12 vjeç ( adoleshentët)
-Mbani modelin e sjlljes së mirë ndaj teknologjisë. Edhe pse ata po rriten kanë nevojë të flasin me ju, jo vetëm me shokët apo shoqet e tyre.
-Këshillojini fëmijës tuaj që të ketë privatësinë e tij. Jo çdo gjë duhet postuar nëpër rrjetet sociale!
-Mbajeni njëri-tjetrin nëpër rrjete sociale jo për ta spiunuar fëmijën tënd. Ju duhet të filloni duke i besuar atyre si fillim !
-Mësojini fëmijës tuaj se dhe të dërgosh mesazhe mund të jetë paksa e ndërlikuar. Kur dikush nuk dëgjon tonin e zërit apo nuk shikon gjestet dhe shprehitë e fytyrës, mund të arrijë që dhe të keqkuptohet.
